É considerada por moitos unha illa de contrastes: un continente en miniatura. Isto é así pola súa rica diversidade de ecosistemas que presenta grandes contrastes paisaxísticos nunha superficie pequena. Desta maneira, conviven bosques de laurisilva, costas áridas, grandes penedos e paisaxes volcánicas. A actividade dos volcanes divide a illa na zona norte ou 'illa antiga', que presenta paisaxes abruptas con profundos barrancos e altas montañas, e na zona sur ou 'illa nova', que deixa unha paisaxe desértica formada por lava. No que atinxe á vexetación, A Palma é coñecida como a 'illa bonita' pola súa flora, que comprende 904 especies das cales un 20% son endémicas. Ademais, o illamento xeográfico e o seu complexo relevo fai que a flora teña un interese especial. A fauna, tanto mariña como terrestre, é moi variada e exclusiva do territorio palmeiro. Especies como a 'turque' e a 'rabiche', o canario silvestre e a graña, símbolo da illa, destacan entre os vertebrados. A Palma ten unha superficie de 708 quilómetros cadrados e unha altitude de 2.426 metros. Conta con 70.692 hectáreas, das cales, 24.865 son espazos naturais protexidos, que representan o 35,17% do total. Do mesmo xeito, 36.256 hectáreas son zonas de especial conservación terrestre, o 51,29%. As zonas de especial conservación mariñas son un total de 10.530 hectáreas, que representan o 14,89% do total.